انفرا ضامن پاکستان اور دی بینک آف پنجاب (بی او پی) کے درمیان مفاہمتی یادداشت (ایم او یو) پر دستخط
انفرا ضامن پاکستان اور دی بینک آف پنجاب (بی او پی) نے پاکستان میں زرعی گوداموں اور ذخیرہ کرنے کے بنیادی ڈھانچے کو مضبوط بنانے کے لیے قرض کی ضمانت پر مبنی مالیاتی نظام متعارف کرانے کے مقصد سے ایک اسٹریٹجک مفاہمتی یادداشت (ایم او یو) پر دستخط کیے ہیں۔ یہ اقدام فصلوں کی کٹائی کے بعد زرعی اجناس کو محفوظ کرنے کی گنجائش بڑھانے، نجی شعبے کی سرمایہ کاری کو فروغ دینے اور ملک میں طویل مدتی زرعی ترقی کی معاونت کی جانب ایک اہم پیش رفت ہے۔
دستخطی تقریب سے خطاب کرتے ہوئے، بینک آف پنجاب کے گروپ چیف، کنزیومر بینکنگ گروپ نے اس بات پر زور دیا کہ یہ اشتراک بینکاری شعبے کی ان شعبوں کو قرض فراہم کرنے کی صلاحیت میں نمایاں اضافہ کرے گا جنہیں ماضی میں زیادہ خطرات کا حامل سمجھا جاتا رہا ہے۔ انہوں نے کہا کہ انفرا ضامن کا قرض کی ضمانت کا نظام مالیاتی اداروں کو ممکنہ خطرات کم کرنے میں مدد دے گا، جس کے نتیجے میں وہ گوداموں اور ذخیرہ کرنے کے بنیادی ڈھانچے کے لیے زیادہ اعتماد کے ساتھ مالی معاونت فراہم کر سکیں گے۔
اس موقع پر انفرا ضامن پاکستان کے چیف انویسٹمنٹ آفیسر، عامر مسعود نے کہا:
”بینک آف پنجاب کے ساتھ ہمارا اشتراک پاکستان کے زرعی شعبے کے لیے منظم اور قابلِ استطاعت مالی وسائل کی فراہمی کو وسعت دینے میں ایک اہم سنگِ میل ہے۔ یہ مفاہمتی یادداشت زرعی شعبے کو جدید خطوط پر استوار کرنے، فصلوں کی کٹائی کے بعد زرعی اجناس کے بہتر انتظام اور مالی وسائل تک بہتر رسائی کے ذریعے کسانوں کو بااختیار بنانے کے قومی ایجنڈے سے ہم آہنگ ہے۔“
یہ مفاہمتی یادداشت دونوں اداروں کے درمیان مزید گہرے تعاون کی بنیاد فراہم کرتی ہے۔ پروگرام میں پیش رفت کے ساتھ، آئندہ مراحل میں ایک باضابطہ ماسٹر گارنٹی معاہدے (ایم جی اے) کو حتمی شکل دی جائے گی۔